Tit 2 | KYG | STEP | Ani agufa hosu kava'mo hugaya'monanafa kagaemo lokiya gelefe'mo mago'e huka alika apaya malo.

Titus 2

Alopa vaya'e neya vaya'efe'mo, ina kava'mo hiyo, huka hapa paiyo, huno ha pai'niya gemae

1 Ani agufa hosu kava'mo hugaya'monanafa kagaemo lokiya gelefe'mo mago'e huka alika apaya malo. 2 Kosuna vaya'aife'mo hapa paige'apao hapau'niya kavate'mo alagepa hu'a yagai'a atege alagepa hu'a yagai'a ne'apataya yahauve vayakana hu'a maige apaipa apakesale'mo alagepa hu'a yagai'a atege aigofe'mo osu'a lokiya vai'a apakesa afi'a fatago huge hapau apayamopafi'mo hapauge atafau'a alagi hu'a maige hu'a maiyo. 3 Ani kava huka anekalo a'ne'aife'mo alika apaya malege'apao ani'mo ne'ne'a negi gemo osuge hosu faigoko gemo osuge hute'a alagepa hu'a yagai'a ne'apataya yahauve a'negana hu'a maiyo. Apakaemo alagepa gemo venemo a'ne anaga'aife'mo ali'a apaya malege'apao 4 afite'apae'mo anau'apimogi'e mafa'ne'api'efe'mo hapau apayamopafi'mo hapaino. 5 Ali'a apaya malesage'a venemo a'nemogimo afite'apae'mo apaipa apakesale'mo alagepa hu'a yagai'a atege yaveyave apaipa apakesa afige no'apifi'mo alagepa ali'ya alige yuna apaipa kalige anau'apimogi apaiyafi'mo maige husage'apae'mo muki vaya'mogi Goti ge'ae'mo hu'a faipa hu'a o'ategae.

6 Ani kava huka neya vaya'aife'mo, lapaipa lapakesale'mo alagepa hutapa yagaita ateyo, huka apakesamo alika hapa paiyo. 7 Kagaemo muki kava'alefe'mo vaya'mogi kakame hisaya agufa alagepa kava'age'mo huvo. Alika apaya ne'malekae'mo okasalisiya geleti'mo lokiya'age geleti'mo Gotitefe'mo ali'ya'mo ne'alika alika apaya malo. 8 Hu'a faipa hu'a o'atesayafe'mo alagepa lokiya gemo hapa paige'apao kame vayakamogi lagaefe'mo hosu faigoko gemo osisageno apavagage hino.

9 Nofite'mo mai'ne'a ali'ya ne'aliya vaya'aife'mo, kava vekatapimo ge'amo ne'afitapa muki ali'ya'alefe'mo amuse hisiya agufa kava'mo hiyo. Kava vekatapimo ge'ale'mo aeta atagaina hutapa osuta male'nisiya yapati'mo mago ya'mo kumaya o'alitapa alagepa kava'mo higeno'ao kava vekatapimo'a, alagepa hu'a ali'ya'mo ne'aliya vaya'mo mai'nae, huno hino, huka hapa paiyo. Apakaemo muki ani kava'mo hisaya kavateti'mo Goti'a lagufamo alino katino nelateya vekamo ge'ale'mo ali'a asaga hu'a atesayafe'mae.

Alagepa kava'mo nehutapa Kalaisife'mo agava maiyo, huno hu'niya gemae

11 Goti'a fiku hapa maeno apamiteno'ae'mo vaya'ai apakufamo alino katino ne'apateya kava'amo muki vaya'mo ago alino afole aino apave li'niye. 12 Goti'a ani kava'aleti'mo huno'ae'mo, mono nosaya kavatapimogi ma mopafi kavafe'mo lapa'ye nehiya kavatapimogi hutapa alita ataletetapa hemenimo mai'netapae'mo lapau'niya kavate'mo yagaige vaya'aitegamo fatago kava'mo huge Gotifeke'mo mono huge hutapa maiyo, huno alino laya ne'male. 13 Ani kava'mo nehutae'mo ala vekamo Gotitimo'a lagufamo alino katino nelateya vekamo Yesu Kalaisi ha le konali ya'amo afole aisiyafe'mo lamogaga aita agava ne'maune. 14 Agaemo muki hosu kava'mo nehuna kavategati'mo miya faino hatu maeno lateteno'ae'mo hosu kavatimo aeno kalo paeno late'nigeta agai'a vaya'amo mai'neta layamukiki huta alagepa kava'mo huta maisunafe'mo agai'a agufa'amo ofalinigana huno alino Goti'mo ami'niye. 15 Ani kavatefe'mo alika apaya ne'malekae'mo himamukaleti'mo alagepa kava'mo hisayafe'mo apakesamo alige hosu kava'mo osisayafe'mo hosu kava'mo nehae, huka huge huka hapa paiyo. Mago vaya'mo apate'nege'a afa ne'mo mai'nane, hu'a osiyo.